هالا جي هڪ تعليم يافته فئملي ملائيشيا ۾ - الطاف شيخ

هالا  جي  هڪ  تعليم  يافته  فئملي  ملائيشيا  ۾

الطاف شيخ

جالان تئانڪو عبدالرحمان، ڪراچيءَ جي شاهراهه محمد علي جناح وانگر ڪوالالمپور جو هڪ پراڻو رستو، منهنجو شروع کان دلپسند رهيو آهي. خاص ڪري اهو حصو جتي ٻه ٻيا اهم روڊ ’جالان راجا لائوت‘ ۽ ’جالان ڊانگ وانگي‘ ملن ٿا ۽ انهن جي وچ واريون سوڙهيون گهٽيون جالان اصفهان، جالان ملايو، جالان بونس، جالان ڪولون ۽ جالان منشي عبدالله ملن ٿيون. اتي ئي انڊين دڪان آهن ۽ هتي جي آڳاٽي مسجد ’مسجد انڊيا‘ آهي. آئون جڏهن به ڪوالالمپور شاپنگ لاءِ ايندو هوس ته جالان تئانڪو عبدالرحمان واري روڊ جي پاسي وارين گهٽين مان ڪنهن هڪ گهٽيءَ ۾ ڪار کي پارڪ ڪندو هوس. هتي هڪ دفعو وڄ (کنوڻ) ڪري هئي ۽ ڪجهه موٽر سائيڪلون ۽ منهنجي ڪار جو ڪجهه حصو ان جي لپيٽ ۾ اچي ويو هو. بهرحال ڪو ڪم ڪار نه هوندو هو ته مسجد انڊيا ۾ اندر يا ٻاهر  روڊ تي رکيل بينچ يا دڪيءَ تي ويهي ايندڙ ويندڙ ٽوئرسٽ ۽ مڪاني ماڻهن کي ڏسندو هوس ۽ خبرچار ڪندو هوس. هتي انڊيا جا به ڀانت ڀانت جا ماڻهو نظر اچن ٿا. سنڌي هندو، سک، گجراتي، تامل، مدراسي، ملباري، بنگالي، پارسي وغيره پڻ جام آهن. جتي ڪٿي گاڏي وارا مختلف شيون، ملئي مٺايون، فروٽ وڪڻندي نظر اچن ٿا. 1986ع ڌاري هڪ سک ڀوپيندر سنگهه جالان ملايو تي ”جئه هند“ نالي مٺائي جو دڪان کوليو. هن ٻڌايو ته سيپانگ ۾ هن جو مينهنِ جو واڙو آهي، جتان ايندڙ نج کير مان هو مائو، برفي ۽ کير-پُڙا ٺاهي ٿو. بهرحال هن اهڙي ته سٺي مٺائي شروع ڪئي جو ماڻهن، انڊيا ۽ پاڪستان کان مٺائي گهرائڻ ڇڏي ڏني.

شروعاتي ڏينهن ۾ سندس دڪان تي اسين پاڪستاني ۽ اتر هندستاني ويندا هئاسين. هينئر ڏٺم ته ملئي، تامل، چيني ويندي فارينرن جي به رش لڳي پئي هئس. مسجد انڊيا جي ٻاهر واري روڊ ”جالان مسجد انڊيا“ واري گهٽي ”جالان بونس“ ۾ ريسٽورنٽ ياسين، سالن کان مشهور آهي. تامل مسلمان جي هن ريسٽورنٽ ۾ اڳ ۾ رڳو انڊين ۽ پاڪستاني مسلمان ايندا هئا، پر هينئر ڏٺم ته چيني ۽ ملئي ماڻهن سان ڀري پيئي هئي. جيئن اسان کي انگريزي کاڌا ڊبل روٽي، بن، برگر، پيزا کائي کائي انهن شين جو ٽيسٽ ڊيولپ ٿيو آهي، تيئن هتي جي ملئي ۽ چيني ماڻهن کي اسان جي چپاتي، پوري، نان، ٻوڙ ۽ مدراسين جو اڊلي، ڊوسا کائڻ جو شوق پيدا ٿيو آهي.

مسجد انڊيا جي ٻاهران اڄ به ڪيترا ئي اديب، شاعر، آرٽسٽ نظر اچن ٿا. شام جي وقت هتي ڪيترا تيل مالش ڪرائيندي ۽ جسم کي آڍرائيندي نظر ايندا. ڪيترا جڙين ٻوٽين وارا، پنهنجيون دوائون وڪڻڻ لاءِ مجمع لڳائي، ملئي ۾ ليڪچر ڏيندي نظر ايندا. ڪوالالمپور ۾ ڪنهن سان ملڻو هوندو هو ته هميشه مسجد انڊيا ۾ اندر يا ٻاهر ”مسجد انڊيا روڊ“  تي ترسڻ لاءِ چوندو هوس. جيئن اڳلو بور نه ٿئي. ايندڙ ويندڙ سان ڪچهري ڪندو رهي يا وري ڪلفي يا بوهي مڱ وٺي کائي. يا مفت ۾ ڪنهن بازيگر جو بيهي تماشو ڏسي. ڪجهه اهڙي رونق هوندي آهي، جهڙي ڪراچيءَ ۾ ايمپريس مارڪيٽ، برنس روڊ يا کارادر ۾ مڇي مياڻي مارڪيٽ وٽ آهي. آئون هميشه اهو چوندو هوس ته هنن گهٽين ۾ جن جا گهر ۽ فليٽ آهن، تن لاءِ ته هر وقت مفت جي وندر آهي. جڏهن بور ٿين، گهر کان ٻاهر نڪري اچن. فروٽ، ڀاڄي يا ڪپڙي لٽي لاءِ به کين بس ۾ يا ٽئڪسي ڪري ڪيڏانهن وڃڻو نٿو پوي. هر شيءِ در وٽ رکي آهي ۽ تمام سستي. ايتري قدر جو هتي جي وڏن دڪانن ۾ به صحيح معنيٰ جيSale  لڳي ٿي. ماڻهن جي پيهه پيهان هجڻ ڪري، هتي سستي اگهه تي شيءِ وڪڻڻ وارو به گهڻو ڪمايو وڃي. ڇو جو سندس لاءِ، انيڪ خريدار هر وقت حاضر آهن.

اسان جي ڳوٺ ۽ پاڙي ۾ رهندڙ ڊاڪٽر شڪيل پنهنجي يونيورسٽيءَ جي ڪئمپس ۾ رهيو ٿي. هاڻPh.D.  ڪرڻ ۽ شاديءَ بعد، شهر ۾ رهي ٿو. سندس شادي به هالا مان ٿي آهي ۽ اسان جي، سندس زال نسيم وارن سان پڻ واقفيت آهي. وٽس رات جي ماني کائڻ جي حامي ڀريم. پڇيومانس؛ ”رهين ڪٿي ٿو؟“ وراڻيائين؛ ”مسجد انڊيا جي ڀرسان.“ مون سمجهيو؛ چرچا پيو ڪري. پر پوءِ ٻڌايائين؛ ”مسجد انڊيا روڊ جي ڀرواري گهٽي ’جالان منشي عبدالله‘ تي جيڪا ويهه ماڙ منارا سٽي ون ڪنڊوميم آهي، ان جي سورهين فلور تي مسواڙ تي فلئٽ ورتو اٿم.“

”توهان ٻڌايو ته توهان کي سڀاڻي ڪٿان اچي کڻان؟“ ڊاڪٽر شڪيل مون کان پڇيو.

”ڪوالالمپور جي هيڏي وڏي شهر ۾ مون کي ڳولڻ جي ضرورت آهي ئي ڪا نه.“ چيومانس.

”ڇو ڀلا؟“ حيرت مان پڇيائين.

”ان ڪري جو تون پنهنجي بلڊنگ مان نڪرندين ته مون کي اتي ئي جالان منشي عبدالله روڊ تي ڏسندين يا کڻي ٿورو اڳيان مسجد انڊيا واري روڊ تي.“

ٻئي ڏينهن آئون پاڻ ئي ڊاڪٽر شڪيل جي بلڊنگ وٽ اچي پهتس ۽ فون ڪري کيس هيٺ گهرايم. جيئن مون کي پنهنجي فليٽ تي وٺي هلي. در اصل، دنيا ۾ جيڪا دهشتگرديءَ جي لهر شروع ٿي آهي، ان کي منهن ڏيڻ لاءِ، ملائيشيا جي هوٽلن توڙي وڏين عمارتن ۾، سيڪيورٽيءَ جو سسٽم سخت ڪيو ويو آهي. ڪنهن به فليٽ يا هوٽل جو ڪمرو تيسين نٿو کلي، جيسين ان ۾ مالڪ پنهنجو اليڪٽرونڪ ڪارڊ نٿو وجهي ۽ لفٽ کي هلائڻ لاءِ به اهو ڪارڊ وجهڻو پوي ٿو. ان مان اهو نقصان ضرور ٿيو آهي جو مالڪ کي مهمان جي آڌر ڀاءُ ڪرڻ لاءِ هيٺ لهي روڊ تي پهچڻو پوي ٿو. ساڳيءَ طرح واپسيءَ تي هو فليٽ جي ٻاهران بيهي موڪلائي نٿو سگهي، ڇو جو هيٺ وڃڻ ۽ بلڊنگ جي گيٽ مان نڪرڻ لاءِ کيس مالڪ جو اليڪٽرونڪ ڪارڊ کپي يا مالڪ جو، ساڻس گڏ هيٺ تائين لهڻ ضروري ٿيو پوي.

ڊاڪٽر شڪيل ۽ نسيم جي هن سال شادي ٿي آهي، جنهن لاءِ هو ڳوٺ آيو هو. سندن فليٽ 16هين فلور تي هجڻ ڪري، سندن گهر جي بالڪني ۽ ڪمري جي درين مان سڄو ڪوالالمپور شهر نظر اچي ٿو. ايترو مٿي سخت گرميءَ ۾ به هوا جو جهوٽو لڳندو رهي ٿو. هيٺ جيڪو حيدرآباد جي حيدر چوڪ وارو گوڙ لڳو رهي ٿو، مٿي پهچڻ سان ماٺ مٺوڙي جي دنيا ۾ اچيو وڃجي. مون شڪيل ۽ نسيم کي چيو؛ ”توهان خوش نصيب آهيو جو شهر جي وچ جو به فائدو وٺي رهيا آهيو ته ٻهراڙيءَ جو به. ڪنهن به شيءِ جي ضرورت پوي ته ڪار ڪڍڻ جي به ضرورت ناهي. مڙس يا زال ٻن منٽن ۾ پيرين پنڌ هيٺان وٺي اچي سگهي ٿو ۽ ڪهڙي شيءِ آهي، جيڪا هتان نٿي ملي ۽ ٿورو اڳيان هلڻ سان چوڪٽ مارڪيٽ آهي، جتي هر قسم جو گوشت ۽ گانگٽ مڇيون مليو وڃن.“

ڊاڪٽر شڪيل ۽ سندس زال نسيم جو هالا جي بيحد پڙهيل ڳڙهيل، نيڪ ۽ باعزت فئملين سان واسطو آهي، جن هر فيلڊ ۾ محنت ۽ پورهيو ڪري پنهنجو ۽ پنهنجي ملڪ جو نالو پيدا ڪيو آهي. ڊاڪٽر شڪيل جو ڏاڏو حاجي محمد يوسف اڄ کان سؤ سال کن اڳ 1912ع ڌاري هالا نوان ۾ ڄائو. تن ڏينهن ۾ انگريزي تعليم اڃا عام نه ٿي هئي، ڳوٺ جا ٻار ننڍي هوندي قرآن شريف ۽ اسلامي تعليم سان گڏ ڪو هنر سکي روزگار کي لڳي ويندا هئا. حاجي محمد يوسف بنيادي تعليم حاصل ڪرڻ بعد زمينداري ۽ سُٽَ-ڪپڙي جو ننڍڙو بزنيس شروع ڪيو. ٻارن ٿيڻ تي، هن کين گهڻي کان گهڻو پڙهائڻ جو سوچيو. تيسين هالا ۾ مخدوم غلام حيدر جي ڪوششن سان هاءِ اسڪول به ٺهي ويو هو. کيس پنج پٽ ٿيا، جيڪي سڀ ڊاڪٽر، انجنيئر ۽ سرڪاري ڪامورا ٿيا. سندن وڏي پٽ عبدالرحمان، جيڪو پوءِ مهراڻ يونيورسٽي جو وائيس چانسلر ٿيو، هالا مان مئٽرڪ ڪرڻ بعد، حيدرآباد جي گورنمينٽ ڪاليج مان انٽر ڪئي ۽ 1963ع ۾ سنڌ يونيورسٽيءَ مان اليڪٽرونڪس مانB.Sc.  آنرس ڪئي. پاڻ پهريون سنڌي آهي، جنهن اليڪٽرونڪس ۾ ماسٽرس ۽ ان بعد ڊاڪٽوريٽ ڪئي. ماسٽرس جي ڊگري هن باٿ يونيورسٽي برسٽل مان 1967ع ۾ ڪئي. انهن ڏينهن ۾ باٿ يونيورسٽي عارضي طرح برسٽل ۾ هئي، جيڪا پوءِ بعد ۾ باٿ شهر ۾ شفٽ ٿي. برسٽل جو شهر لنڊن کان ٻن ڪلاڪن جي ڊرائيو تي آهي.

ماسٽرس جي ڊگري حاصل ڪرڻ بعد، عبدالرحمان سٽي يونيورسٽي لنڊن مان 1972ع ۾ اليڪٽريڪل انجنيئرنگ ۾ Ph.D ڪئي ۽ ان بعد لڳاتار مهراڻ يونيورسٽيءَ ۾ پڙهائيندو رهيو ۽ سال 2004ع تائين يعني رٽائرمينٽ تائين وائيس چانسلر به ٿي رهيو. اڄڪلهه هو همدرد يونيورسٽيءَ ۾ ڊين آف انجنيئرنگ آهي. ڊاڪٽر عبدالرحمان پهريون سنڌي آهي، جنهن ملائيشيا ۾ پڙهايو. هن 1977ع کان 1981ع تائين، چار سال، شاهه عالم شهر جيITM  (انسٽيٽيوٽ ٽيڪنالاجي مارا) ۾ اليڪٽرانڪس ۽ اليڪٽريڪل انجنيئرنگ پڙهائي. اڄڪلهه اهو ڪاليج، يونيورسٽيءَ جو درجو رکي ٿو. ڊاڪٽر صاحب کي ڪو به اولاد ناهي، پر ماشاءَ الله سندس هڪ ڀاءُ ۽ ڀائٽيا ڀاڻيجا، هن ملڪ مان اعليٰ تعليم حاصل ڪري ويا آهن ۽ ڪجهه هتي نوڪريون ڪري رهيا آهن، جن مان دل جو ماهر ڊاڪٽر شڪيل ميمڻ به هڪ آهي.

ڊاڪٽر شڪيل جو والد صاحب، حاجي احمد جنھن کي اسان ”حاجن“ سڏيون ٿا، سو وي سي ڊاڪٽر عبدالرحمان کان پوءِ ٻئي نمبر تي ڀاءُ آهي. هو منهنجو هم عمر ۽ جيسين آئون هالا ۾ پڙهندو رهيس ته منهنجو ڪلاس ميٽ هو. حاجن کي پنج ٻار؛ 3 پٽ ۽ 2 ڌيئون آهن. ماشاءَ الله ڳوٺ ۾ رهي به هنن اعليٰ اخلاق ۽ تعليم حاصل ڪئي. ڊاڪٽر شڪيل ٻئي نمبر تي آهي. کانئس وڏي ڀيڻ ڊاڪٽر شاهينا آهي، جنهن جي شادي منهنجي هالا جي هڪ ٻئي وڪيل دوست محمد هاشم ميمڻ جي پٽ ڊاڪٽر امتياز سان ٿي آهي ۽ ٻئي زال مڙس سعودي عرب ۾ نوڪري ڪن ٿا. ڊاڪٽر شڪيل جي ٻي ڀيڻ، ڊاڪٽر شهناز سڀني ۾ ننڍي آهي ۽ ڊاڪٽر امتياز جي ننڍي ڀاءُ ڊاڪٽر اياز جي زال آهي.

ڊاڪٽر شڪيل جو ٻيو ڀاءُ، ڊاڪٽر عقيل به هن وانگر اسپيشلٽ آهي. ڊاڪٽر شڪيل دل جي آپريشن جو سرجن آهي ۽ ڊاڪٽر عقيل آرٿو پيڊڪ (هڏن جو) سرجن آهي. ڊاڪٽر عقيل ڄامشورو مان MBBS ڪرڻ بعد، ڪراچيءَ جي ماهر سرجن محمد علي شاهه وٽ ڪجهه سال ڪم ڪيو، ان بعد هوMRCS  لاءِ ملائيشيا ۾ پڙهيو. تعليم دوران ئي کيس ايڏو قابل سمجهيو ويو جو ملائيشيا حڪومت کيس ڪنهن ٻئي ملڪ وڃي نوڪري ڪرڻ بدران پاڻ وٽ ئي نوڪريءَ جي آڇ ڏني. هو اڄڪلهه ايسٽ ملائيشيا جي رياست سباح جي شهر ”ڪوٽا ڪنابالو“ جي سرڪاري اسپتال ۾ ڪم ڪري ٿو ۽ سندن ننڍو ۽ آخري ڀاءُ جميلMBA  ڪئي آهي.

ڊاڪٽر شڪيل جي والد، حاجي احمد  عرف حاجن کان پوءِ، اسماعيل لالا آهي، جيڪو نواب شاهه ۾ ڊپٽي ڊائريڪٽر حيسڪو آهي. ان بعد چوٿون ڀاءُ عبدالمجيد ۽ پنجون ڀاءُ امجد، انجنيئر آهن. امجد مهراڻ مانBE  ڪرڻ بعد، ملائيشيا جي شهر جوهور بارو جيUTM  يونيورسٽيءَ مان انجنيئرنگ ۾M.E. ڪئي ۽ پوءِ ڪئناڊا مانPh.D.  ڪئي ۽ اڄڪلهه اتي ئي نوڪري ڪري ٿو.

چاچي محمد يوسف ميمڻ کي ٻه ڌيئون ٿيون. يعني ڊاڪٽر شڪيل کي ٻه پڦيون آهن. ننڍي پڦيءَ جي شادي مٿي ذڪر ڪيل وڪيل هاشم ميمڻ سان ٿي ۽ وڏي پڦي، ادي صالحان جيڪا وائيس چانسلر عبدالرحمان ۽ حاجن جي وچ ۾ آهي، ان جي شادي سائين علي محمد متقي جي ٻئي نمبر پٽ نور دين سان ٿي. اڄ هي لکندي مون کي پنهنجو ننڍپڻ ٿو ياد اچي. جڏهن 60 سال کن اڳ، آئون ڇهن ستن سالن جو هوس، تڏهن کان منهنجو سائين علي محمد جي گهر ۾ گذر ٿيندو هو. سندن گهر ۽ اسان جي گهر جي اتر واري ڀت ساڳي هئي، جنهن ۾ ٺهيل در مان اسان ڀائرن ڀينرن جو وٽن اچڻ وڃڻ هوندو هو. سچ ته اهو آهي ته سائين علي محمد ۽ سندن ڀرواري گهر ۾ رهندڙ سندن ڀاءُ فيض محمد، جنهن کي اسان چاچا فيضو سڏيندا هئاسين، ۽ ان جي گهرواري ماسي عمليءَ اسان کي ويجهن مائٽن وانگر چاهيو ٿي. سندن پوءِ سگهو ئي انتقال ٿي ويو. نه صرف انهن جو پر چاچي فيضوءَ جي اڪيلي پٽ انجنيئر عبدالباقيءَ جو به جواني ۾ موت ٿي ويو. ڇا ته لاجواب انسان هئا. اڄ به سندن ٻارن نور دين ۽ سندس ڀاءُ مهراڻ يونيورسٽي جي پروفيسر معين ۽ عبدالباقيءَ جي ٻارن ڊاڪٽر اعجاز ميمڻ کي ڏسي سندن وڏا ياد اچي وڃن ٿا. هالا جي هيءَ ميمڻ فئملي نه فقط نالي ۾ پر صحيح معنيٰ ۾ متقي چئي سگهجي ٿي، جن کي اسان ڪڏهن کهرو ڳالهائيندي نه ٻڌو. نماز روزي جا هميشه پابند رهيا. سادگيءَ ۾ زندگي گذاري، پنهنجي اولاد کي تعليم جهڙي زيور سان آراسته ڪيائون. ڏکئي وقت تي، پاڙي اوڙي جي ڪم آيا ۽ ڪڏهن به ڪنهن سان ٺڳي دولاب نه ڪيائون. ماسي عمليءَ وارن جو ٺهيل آچار، آئون ڪڏهن به وساري نه سگهندس. خاص ڪري پتائي گجرن جو، جنهن کي هو ”آهري“ سڏيندا هئا. اهو آچار يعني آهري، ٻن قسمن جو هوندو هو. هڪ کٽو، جيڪو هو منجهند جو کائيندا هئا ۽ ٻيو چاش وارو مٺو، جيڪو خاص ڪري نيرن لاءِ هوندو هو.

جپان ۾ صبح جو هوٽلن ۽ مسافر خانن ۾ ملندڙ ”مسو شيرو سوپ“ ڏسي، مون کي پروفيسر معين ۽ ڊاڪٽر اعجاز جي ڏاڏيءَ جي ٺهيل مٺي آهري ياد اچي ويندي آهي. سندن گهر ڀرسان ئي وائيس چانسلر عبدالرحمان ميمڻ وارن جو گهر آهي، جنهن جي ڀائرن ڀينرن جي ڳالهه ڪري رهيا هئاسين ته سندن وڏي ڀيڻ ادي صالحان جي شادي سائين علي محمد متقي جي پٽ نور دين سان ٿي. کين ٽي ٻار آهن. هڪ ڌيءَ مهرين ۽ ٻه پٽ. ننڍو پٽ عمير بنيادي تعليم بعد، پنهنجي پيءُ سان گڏ بزنيس ڪري رهيو آهي ۽ وڏو پٽ زبير، مهراڻ يونيورسٽيءَ ۾ پروفيسر آهي ۽ سندس شادي پنهنجي سؤٽ، پروفيسر معين جي ڌيءَ نزهت، سان ٿي آهي، جيڪا پڻ ڊاڪٽر آهي.

پروفيسر زبير جي ڄم جي تاريخ 12 مارچ 1974ع آهي. پاڻ 1998ع ۾ مهراڻ يونيورسٽي مان سول انجنيئرنگ ۾B.E.  ڪيائين، ان بعد ملائيشيا اچي جوهوربارو جي يونيورسٽي ٽيڪنيڪل مارا مان سن 2000 ۾M.E.  ڪيائين. سندس سبجيڪٽ ڪنسٽرڪشن مئنيجمينٽ رهيو. ان بعدSAITA  ڪمپنيءَ ۾ انڊس هاءِ وي ڪوهاٽ ۽ پشاور ٽنل تي ڪم ڪيو. ان بعد هن مهراڻ يونيورسٽيءَ ۾ نوڪري شروع ڪئي ۽ ٻه سال نوڪري ڪرڻ بعد هن جوPh.D.  ڪرڻ جو ارادو ٿيو. اسڪالرشپس جي کوٽ ڪري هو پنهنجي خرچ تي ملائيشيا آيو ۽ سال 2003ع کان 2007ع تائين جوهوربارو جي ساڳي يونيورسٽيءَ ۾ پڙهي ڊاڪٽوريٽ جي ڊگري حاصل ڪيائين.